KabarJino |Bagian ke 2
Haba peuingat lon sambong bacut
Wahe e Yahcut sama ta jaga
Nak bek meusalah wate ta pubuet
Bak akhe bek jeut tanyoe binasa
Le that ta kalon jinoe dum meucr’eut
Wab salah pubuet tamong penjara
Seubab peulaku pakriban yang h’eut
Akhe adekcut teulah geuh raya
Teulah ‘oh akhe hana jeut keubuet
Wate ka meucr’eut baro ta kira
Pike hai adoe seugoh lom pubuet
Yang h’an jeut keubuet bek ta keureuja
‘Oh gop peutaba bek laju meuh’eut
Ta pike bacut yoh goh keureuja
Ta eu gop le peng ta kalon peu buet
Kadang ji mubuet agen narkoba
Bek hawa jai peng nyo nyan ta pubuet
H’an trep meubacut langsong penjara
Desya bak Tuhan pih kon cit bacut
Tanyoe geu yuet2 dalam nuraka
Yang candu sabei sosah kon bacut
Nyo gohlom ji rh’uep saket jih raya
‘Oh lheuh keunong nyan meubaro troh h’eut
Boh ek jeut keubuet nyo meunan cara
Tapi nyo tan peng atra gop ji kuet
Peunteng na bacut ngon bloe narkoba
Ma ngon Yah male wap Aneuk mubuet
Tapi meubacut hana ji kira
Ureung lam Gampong sosah kon bacut
Dum peu ji tem kuet wahe syedara
Dak manok keumarom jitem cit sekuat
Asai na bacut ngon bloe narkoba
Wahe aneuk lon yang mantong cut-cut
Beudoh ta jak beuet deungon sikula
Gata beuingat bek jeut gop peungeut
Beujeumot ta beut ileumee agama
Meurunoe buet jaroe beurangkapeu jeut
Nak mangat bacut mita keureuja
Ngon ketrampilan wahe adoe cut
Dak beurangkapeu buet mudah ta mita
…… Bersambung
Komentar