Salam ‘alaikum wahe e wareh
Apa ngon Cut Teh sigo lon sapa
Sambot saleum lon mandum e wareh
Hana lon peuceh tuha ngon muda
Na bacut haba ulon neuk reunteh
Pilpres e wareh lon neuk ceurita
Meunyo baroekon bacut seuliseh
Jinoe hai wareh ta kumpoi teuma
Bek deungon wab nyan ka putoh wareh
Masa ka abeh tanyoe bek dawa
Peuresiden RI pih ka lheuh teupileh
Waki jih meuceh jinoe pih kana
Beuthat h’an keunong ban tanyoe pileh
Bek cit hai wareh tanyoe meudawa
Bek gara gara meubeda pileh
Tanyoe e Cut Teh putoh syedara
Jinoe awak nyan ka saboh bareh
Deungon ate gleh ka ji meuwa wa
Peulom geutanyoe yang tukang pileh
Beuthat pih peudeh tasaba-saba
Tanyoe meulakee bak Tuhan keudeh
Yang buet meulanggeh jih beuceulaka
Yang peugot curang kon lage gareh
Geuhukom sideh oleh Rabbana
Yang peunteng tanyoe ka lheuh tapileh
Ka lheuh hai wareh ta bri suara
Talo ngon meunang ta pulang keudeh
Yang peunteng ka ta pileh ureung yg beuna
Nak makmu nanggroe niet wate ta pileh
Bek na le si paleh caci agama
Atoran Allah bek gop peujayeh
Nyan keuh hai wareh tanyoe useuha
Meunyo meunan niet wate tapileh
Jeut ta peutanggongjawab keudeh nibak Rabbana
Meunyo salah buet yang tanyoe pileh
Tanyoe troh keudeh meusalah hana
Aneuk leuk kutru di cong bak manggeh
Di cong keureuleh na ticem pala
Meunyo cit salah lage lon tuleh
Wahe e wareh meu’ah beuraya
Tan niet meubacut gop lon peujayeh
Hana cit wareh gop lon jak hina
Beuthat geutanyoe meubeda pileh
Deungon ate gleh jinoe ta meu’ah desya*
Komentar